ന്യൂഡൽഹി: രാജ്യത്തേക്കുള്ള സ്വർണ്ണ ഇറക്കുമതി ഓരോ വർഷവും കൂടി വരുന്ന സാഹചര്യത്തിൽ, ആഭ്യന്തര സ്വർണ്ണ പര്യവേക്ഷണവും ഖനനവും ശക്തിപ്പെടുത്തുന്നതിനായി പുതിയ കർമ്മപദ്ധതി പുറത്തിറക്കാന് നീതി ആയോഗ്. മേഖലയിലേക്ക് കൂടുതൽ നിക്ഷേപകരെ ആകർഷിക്കുകയാണ് ഇതിലൂടെ ലക്ഷ്യമിടുന്നത്. സ്വർണ്ണ ഖനന മേഖലയ്ക്ക് സാമ്പത്തിക പ്രോത്സാഹനങ്ങൾ നൽകുന്നതിനൊപ്പം, ദീർഘകാല ഖനന അനുമതി അനുവദിക്കുക, സാങ്കേതിക മികവും സുസ്ഥിര വികസനവും ഉറപ്പാക്കുന്നതിനായി ലേലത്തിൽ പങ്കെടുക്കുന്നവരുടെ നിലവാരം വിലയിരുത്തുക തുടങ്ങിയ സുപ്രധാന നിയന്ത്രണ മാറ്റങ്ങളും പുതിയ ചട്ടക്കൂടിൽ ശുപാർശ ചെയ്തേക്കും.
കേന്ദ്ര-സംസ്ഥാന സർക്കാരുകളുടെ ഏകോപനത്തിലൂടെ ഖനന അനുമതികൾ വേഗത്തിലാക്കുക, ഭൂമിശാസ്ത്രപരമായ വിവരങ്ങൾ മെച്ചപ്പെടുത്തുന്നതിനായി അന്താരാഷ്ട്ര തലത്തിൽ അംഗീകരിക്കപ്പെട്ട റിപ്പോർട്ടിംഗ് മാനദണ്ഡങ്ങൾ നടപ്പിലാക്കുക, പദ്ധതികൾക്ക് ബാങ്ക് വായ്പകൾ ഉൾപ്പെടെയുള്ള സാമ്പത്തിക പിന്തുണ എളുപ്പത്തിൽ ലഭ്യമാക്കുന്നതിന് വ്യക്തവും സുസ്ഥിരവുമായ നയരൂപീകരണം നടത്തുക എന്നിവയാണ് ഈ പദ്ധതിയിലൂടെ പ്രധാനമായും ഉദ്ദേശിക്കുന്നത്. ഭൂമിശാസ്ത്രപരമായ വിവരങ്ങളുടെ അപര്യാപ്തത, പരിമിതമായ പര്യവേക്ഷണം, പദ്ധതികൾ പൂർത്തിയാക്കാനുള്ള കാലതാമസം, ലേല നടപടികളിലെ പോരായ്മകൾ, പദ്ധതികളുടെ സാമ്പത്തിക ലാഭക്ഷമതയില്ലായ്മ എന്നിവ കാരണമാണ് ഇന്ത്യയിൽ സ്വർണ്ണ ഖനനം ഇതുവരെ വലിയ തോതിൽ വളർച്ച പ്രാപിക്കാതിരുന്നത്.
വേൾഡ് ഗോൾഡ് കൗൺസിലിന്റെ (WGC) പിന്തുണയോടെ 'പഹ്ലെ ഇന്ത്യ ഫൗണ്ടേഷൻ' (PIF) തയ്യാറാക്കിയ 'ഇന്ത്യയുടെ സ്വർണ്ണ ഖനന നയം: വെല്ലുവിളികളും പാഠങ്ങളും മുന്നോട്ടുള്ള വഴിയും' എന്ന കരട് റിപ്പോർട്ടിന്മേൽ നീതി ആയോഗ് വൈസ് ചെയർമാൻ അശോക് കുമാർ ലാഹിരി കഴിഞ്ഞ ആഴ്ച ചർച്ചകൾ നടത്തിയിരുന്നു. ഇതിലെ പ്രധാന ശുപാർശകൾ ഇന്ത്യയുടെ സ്വർണ്ണ ഖനന നയത്തിന്റെ ഭാഗമാക്കുന്നതിനെക്കുറിച്ചാണ് വിലയിരുത്തിയത്. സാമ്പത്തിക ശുപാർശകളോട് യോജിക്കുമ്പോഴും, ഗൗരവമുള്ള നിക്ഷേപകരെ കണ്ടെത്തുക, പദ്ധതികൾ സാമ്പത്തികമായി ലാഭകരമാക്കുക, ജിയോസ്പേഷ്യൽ ഡാറ്റയുടെ ലഭ്യത മെച്ചപ്പെടുത്തുക തുടങ്ങിയ വിഷയങ്ങളിൽ കൂടുതൽ വ്യക്തമായ വിവരങ്ങൾ നൽകാൻ നീതി ആയോഗ് പിഐഎഫിനോട് ആവശ്യപ്പെട്ടിട്ടുണ്ട്.
ഇന്ത്യയിൽ ഏകദേശം 501 മുതൽ 518 ദശലക്ഷം ടൺ വരെ പ്രാഥമിക സ്വർണ്ണ അയിര് ശേഖരമുണ്ടെന്നാണ് കണക്കാക്കുന്നത്, ഇത് ഏകദേശം 600 മുതൽ 607 ടൺ വരെ ശുദ്ധമായ സ്വർണ്ണത്തിന് തുല്യമാണ്. ഇതിൽ ഏറ്റവും കൂടുതൽ നിക്ഷേപമുള്ളത് ബീഹാറിലാണ് (44-45%). രാജസ്ഥാൻ (25%), കർണാടക (21%), പശ്ചിമ ബംഗാൾ, ആന്ധ്രാപ്രദേശ് (3% വീതം), ജാർഖണ്ഡ് (2%) എന്നിങ്ങനെയാണ് മറ്റ് സംസ്ഥാനങ്ങളിലെ വിഹിതം.
2025-26 സാമ്പത്തിക വർഷത്തിൽ ഇന്ത്യയുടെ സ്വർണ്ണ ഇറക്കുമതി 71.98 ബില്യൺ ഡോളർ (800 ടണ്ണിലധികം) എന്ന റെക്കോർഡ് ഉയരത്തിലെത്തിയിരുന്നു, ഇതിൽ 34-40 ശതമാനവും സ്വിറ്റ്സർലൻഡിൽ നിന്നായിരുന്നു. എന്നാൽ ആഗോള വിപണിയിൽ സ്വർണ്ണവില ഔൺസിന് 4,000 ഡോളറിൽ താഴെയായി കുറഞ്ഞതിനാൽ, 2026 ഏപ്രിൽ-ഒക്ടോബർ കാലയളവിൽ ഇന്ത്യയുടെ സ്വർണ്ണ ഇറക്കുമതി മുൻവർഷത്തെ 41.24 ബില്യൺ ഡോളറിൽ നിന്ന് 39.9% കുറഞ്ഞ് 24.78 ബില്യൺ ഡോളറായിട്ടുണ്ട്. എങ്കിലും, ആഗോള സ്വർണ്ണ ഇറക്കുമതി മൂല്യത്തിന്റെ 6.7% മുതൽ 9% വരെ വിഹിതവുമായി ലോകത്തിലെ അഞ്ചാമത്തെ വലിയ സ്വർണ്ണ ഇറക്കുമതി രാജ്യമായി ഇന്ത്യ തുടരുകയാണ്.
Content Highlights: India has an estimated 600–607 tonnes of primary gold metal resources, contained in around 501–518 million tonnes of gold ore. Bihar accounts for the largest share at 44–45%, followed by Rajasthan and Karnataka. NITI Aayog is considering a policy blueprint with fiscal incentives, longer mining rights and regulatory reforms to attract investment and strengthen domestic gold exploration and production.